６１８。８２８

政改表決之後，見到呢個投票結果 28(反對)：8(贊成)

有點一頭霧水，點解嘅 . . . . 

跟住睇返新聞，O晒嘴，完全係意料之外﹗

本來係激情(武打)劇黎架嘛：

場外兩派對壘、場內警察佈防，分分鐘硝煙再起，

點知最終變成 “笑聲救地球” 的鬧劇，

昨天由放工後睇住FB留言、二次創作，已經笑咗成晚、笑住黎瞓﹗

今日仲未止到笑，笑到氣咳。

真箇神推鬼賛，阿爺都算唔到﹗

出盡人力物力搞大龍鳳，最終變咗大頭佛，搞到盤數咁肉酸

出黎回應的，個個滿頭油汗，一臉惶恐 . . . . . 

 

笑得黎有尐眼濕濕添 . . . . . 

唉﹗笑埋今日，睇下台戲點唱落去啦 . . . . :-(

近況

好耐冇記七貓的生活了。

因為佢地冇乜互動，而且 No News is Good News . . .

現在我房只有這四貓出入 . . . 

英英與點點仍然水火不容，都唔知幾時至可以門戶大開 :-(

 咁嘅架勢，即係就快開飯啦 ~~~

肥緇和點點間中打鬧，好在係一招了，然後各行各路﹗

 老 Mi 覆診唔使咁密，荷包可以抖一抖，但繼續用藥，冇得停，

雖然瘦骨嶙峋，但精神不俗，會走上樹頂瞓，

到時到候出來攞食，而且佢好乖，肯食腎糧 . . . 仲幾鍾意食添 ;P

有新紙箱紙盒亦第一時間入去坐，跨過死劫的長期病患的老貓，算係咁啦﹗

 點點都唔執輸。何解你仲係唔放過英英呢﹖

大肥緇仍然係咁肥、咁為食，仍然喜歡在我上廁所時伏大脾 XDDD

高清天氣吐露行

星期六 (13/6) 第一堂單車入門班之前，

已約定高手R一起踩一轉以作練習。

昨天 (15/6) 專誠放假一天，踏上人生首次 “長途” 之踩 . . . ;P

十時在大埔墟租車出發，沿吐露港公路單車徑到沙田 . . . . .

沿途大多是筆真寬闊的水泥路，間中要上落斜過隧道，

正合初哥練習。

是日天氣晴朗，藍天白雲，雖然氣溫高達攝氏33度，但濕度只有6x%，感覺清爽；

做足防曬 (闊邊帽、長袖衫加黑超及充足冰水)，也不覺辛苦 XD

 視野良好，在涼亭小休望去吐露港，山青水綠天藍，心曠神怡﹗

 科學園。

偌大的園地 ~ 不准踏單車﹗

風景優美，有不少樹蔭可稍歇 . . .

 

 天空之鏡﹖

沙田富豪花園

下午一時許到達沙田，係時候大休啦，

坐了個多小時，算是稍避日正當空的曝曬 . . . . .

 

嘆完就回程 . . .

最近是阿勃勒的花期，金黃的花瓣，像天空灑下的黃金雨 <3

阿勃勒花

 歸途

返回大埔墟還車已五時許，

散 band 前，搵個地方消暑散熱兼計數，整天消費 98元 ;-)))

呢日踩得非常愜意，亦非常抵玩，單車每位30元，

還車時同阿伯謦咗幾句，佢話業主收舖，做到八月底就走嘞，

佢隔離的單車舖要八、九十元，假期甚至要一百元一日﹗

希望在這兩個月可以再走多一轉 . . . . . ;-(

踩車

整個五月的大部分日子都係烏天黑地，間有暴雨，心情甚為腌悶，

睇劇亦睇到迷迷懵懵，係時候離開平板，會一會太陽伯伯，醒一醒神.....喇 ;P

一直想學好踩單車，惟限於資質，屢試失敗，甚至 . . . . . :'-(

每見別人踩車四周圍去，總覺得很自由、很爽，十分羨慕，

於是報了 “單車入門” 班，開課前，先練習一下吧，請來高手 R 陪踩。

上個月都踩過一次，由於心怯怕跌，雙手死握把手，致雙臂痠軟萬分 . . . . .

十時，上水天平邨出發 . . .

上水梧桐河邊，有寬闊車路卻甚少車和人，是很好的練習場，而且風景不俗。

東江之水越山來

 遠處幾隻怪獸有乜搞作﹖

車泊樹蔭下，否則不出一分鐘已經熱到 “辣” pat pat ;P

是日天氣甚佳，藍天白雲，太陽雖猛卻時有清風送爽 . . . . .

不過 . . . 確係幾熱幾晒 ~ 架﹗

黎到邊境啦 . . . . 

 

中場休息時，幫襯豆腐舖，10元任飲任食豆漿豆花，灌咗三碗漿半碗花 (忘了影相);P

此店為單車友聚腳小休熱點 。

一時許，在就近士多食咗餐高鹽、高鈉、高糖的晏仔﹗

在高溫曝曬之後，躲進冷氣間，灌一支清涼(不夠冰凍)可樂，

的確令人神清氣爽 (鼓掌)

回程時，R 發現我部車的前轆爆了軚，可我卻烏烏下，竟渾然不覺，

於是交換單車，R 的車略高，要適應一下才勉強應付。 ;P

是日的練習，似有些微進步，起碼手腳冇乜痠痛 ^;^