乜事呀 ﹖﹗

動盪的2014，包括荷包，使錢使到一仆一碌，

早知去夏愨道執錢﹗

話說剛搞好小黑的鼻炎，跟住就到臭 Mi 杰撻撻  > <。。。

都怪自己不及早帶她們就醫，抵死 ﹗﹗﹗

然後，早幾日屋企大塞渠，搵師傅搞咗兩個半日，仲要牽涉樓下單位，

那位戶主仁兄係咁齮齕，好在師傅脾氣好，

我差點抵唔住頸...... 師傅後來同我講，呢尐人無謂駁佢咀，

費事佢發狼戾唔俾入屋添呀﹗

. . . . . . 仁兄廚房天花條渠屬我戶的，因塞渠而漏水，

而家同佢整番喎，齮齕乜嘢呢﹖

以心為心，無端端有陌生人入屋搞搞震，當然不爽，但唔使咁長氣啩 ﹖﹗

跟手換埋馬桶水箱個泵，因為漏水好耐了，莫非因而漏財 ﹖

記之﹗

希望穢物一清，福運盈門。

順祝各位新年快樂，身心康泰﹗

Mi 近況

Mi 進步好多啦，可說係回復常態，識得搵返心水位瞓覺攤抖。

食量算回復正常，藥係冇得停架嘞，仍然要以針筒餵混了補充劑的 “漿”，

MiMi 真係好乖，餵藥餵糧不反抗，我怎能不盡力﹖﹗

到晚餐時間，Mi 知頭知路，一如以往，走入廚房，等食﹗

 佢要跟大隊一齊食 . . . . .

放了少少普通罐頭加佢的腎糧。

 食完自家的，更走去“清”人家的兜 ;D

 Mi 已可在地下樹上來去自如 . . . . . 雖然上落時要 “瞄” 耐尐 ;P

不過眼睛發炎未有大進展，星期六要搵醫生睇睇啦。

跨過生和死 . . . . . . .

長毛Mi 月來食多飲多卻消瘦不少，心知不妙，於是帶佢去體檢，豈料幾乎攞佢老命﹗

轉醫生兼與弟婦廿四小時照顧餵食餵藥，總算把老Mi搶回來 m( _ _ )m

照片是稍為好轉時拍的，最差時全身軟耷耷，瞳孔放大，水兜也不敢攞放，

因為佢會埋去望住兜水. . . . . 然後軟攤，頭枕水兜，深恐 1 cm 水都浸死佢﹗

 在我房休養，衫仔、暖墊、暖爐 . . . . . . 盡力而為，不敢再讓她住院﹗

 3/12 出事，照顧幾日已略有好轉，有力站立，

自己去飲水，水兜放高些少，兜內只放少少水，以免佢個頭 “舂” 落去﹗

在 MiMi最差的幾天，小黑圍住佢氹氹轉，抑或係因為張暖墊﹖

鼻塞，要聞氣，當日為小黑購置的聞氣機，用得著，冇嘥 >.<~。

MiMi 確診為腎病，藥物、補充劑一大堆，需食處方糧﹗

經此一役，元氣大傷，老命暫時檢回來了。

現在首要是令她多食多飲，讓身體強壯一點，

上星期六 (13/12) 覆診後，醫囑兩三個月後才覆診，

我想預購兩個月藥物，醫生話唔好配咁多，

萬一有乜事 (此話在整個覆診過程聽咗兩三次﹗)，怕泿費 . . . . . . .

言下之意 . . . . . . 有一日過一日 ﹖﹗

無題

都算係難得一見的場面，獨孤小黑罕有黐貓，

有貓埋身就走開，呢日佢同素素貼身瞓，

佢先伏，素素後上， 佢都唔走喎，

而且，當時唔凍，仲有尐熱添 ;P

好姊妹﹖

第三齡運動會

上星期六 (15/11) 出動做義工。

社區中心搞了一個 “第三齡運動會”，召集義工幫手，

首見“第三齡”這個詞，上網查下，見有第三齡大學，俾退休人士學下嘢，

在香港都有廿年歷史咯喎﹗

雖然係社區活動，但規格做到足。

除啦啦隊外，有進場式、開幕表演(舞蹈、跆拳道、八段錦等)，都由長者擔綱。

重點推介“方形踏步”，可協調腦和四肢。

 比賽時，每名參賽者起碼有一名青年義工傍住和提示 ;-)

抛接豆袋

 

雙人賽講合作

 

頒獎台

比賽分兩組：耆青組(50-69歲)、長青組(70歲以上)

不過，我奇怪69點同50比﹖即使55對65都有距離啦. . . . . .

anyway，友誼第一，比賽第二﹗

然準耆英由上午11時至下午4時企下跑下追下咁影相，

午膳時間食咗個豬柳漢堡，坐咗十零分鐘咋，

都算老當益壯咯 ;DDD

睇見各位“哥哥” “姐姐”，就像見到自己的未來，能不感懷﹗

美景佳餚秋日行

上星期日 (9/11) 四友本來擬定行山，但連續幾天陰雨，深恐路滑，

轉軚行平路：南涌 >> 鹿頸 >> 谷埔，

去到谷埔，怎能不光顧松記﹖

當日天色稍開，得見淺藍天空 (鼓掌)

美景先飽眼福

天清水靜，拍倒影的好時機

 殘荷係歷久常新的題材 ;-)

 到鹿頸已差不多下午一時，有少少餓，因為到松記仍要行一小時左右兼有石級上落，

遂先到開心茶座食件多士打打底，順便打電話問下松記仲有冇嘢食 ;P

沒來一段時日，對面沙頭角尐樓又高咗、多咗﹗

 松記在望，坐低時已兩點幾嘞。

電話訂了半隻雞和魚肚羮。坐低後，老闆話不如要尐蝦啦、魷魚啦、蒸條魚 . . . . . . 

我地咪話：好好好~~~咯，竟忘了問價錢﹗

呢半隻雞麻麻地，似乎不及從前，下次略之。

記得幾年前食過一次魚肚羮，念念不忘，今次麻麻地。

上次食的係魚肚碎(細切?)，配以海味，雖然都係下欄嘢，

但湯羮十分濃鮮，當日食到人人豎姆指﹗

呢日的魚肚大大塊，變了湯，食味就不同了，期望太大，有點失望﹗

尚幸其他由老闆推介的就十分滿意 ，下次都係要 “Omakase” 嘞  ;D

白灼蝦六兩，鮮甜。

  白灼魷魚，剛熟，嫰滑，佐以青芥辣豉油，lam lam 脷﹗

老闆推薦嘅“涼瓜炒苦瓜”，新鮮爽脆。

 蜆肉肥厚味鮮，合時之選。

 老闆話係野釣(魚立)魚，手掌大小，12兩，正﹗

朋友見到鄰桌有尐類似鴨的東西，詢之老闆，佢話係客家醋鴨，

我地只係問下，驚食唔晒，但佢頭也不回， 馬上幫我地落單 . . . . . . .

而呢半隻鴨係我們當日的至愛 ﹗﹗﹗

肉嫰皮薄無脂，佐以特製的醒胃醋汁，好好食，喜出望外，難忘﹗

 老闆效洋廚，攞住杯紅酒，逐枱打牙骹吹水，

好風騷咁話，做星期六、日，其餘五日去玩喎，

每星期都係使完錢就返黎搵錢﹗

四個人食到好飽兼好滿意，共銀752﹗

每碟餸都就返人頭，唔會太多，所以我地食咗 . . . . . . 七款 ;P

澱粉質就免咯 ;DDD  老闆有 “LAU” 我地飲酒，

食到鬼咁開心，本來想飲番一杯，

但佢話要一支喎，呵呵，咁就免嘞﹗

食飽都差不多四點，原路回鹿頸

如果陽光燦爛，就“金”嘞。

久違幾年，這些村屋依然完好。

若在日照之下，這個小草坡會很美﹗

 

永遠喜氣洋洋的簕杜鵑。

由此前行就是鹿頸開心茶座的小巴站，帶著美味回憶踏上歸程。