庸人記食

既然間中會拍攝開餐相，咁不如儲埋一批，

睇下自己在一兩個月食過乜，今次呢堆，恐怕爆燈矣﹗

同事擅烹飪，間中整尐好嘢過我地食，

呢個蛋糕仔好好味，但只用糯米泡製，冇用牛油，算係健康之味 ;-)

 

呢個 cup cake 不得了~甜﹗某日牙檢之後，

經過餅舖買的， 明知係勁甜，見佢地造型可愛，心思思買黎試下，

其實甚少食，但朱古力乃 “賣飛佛” ;P

送小黑到太平道診所做 CT Scan後，在診所附近食 “早晏”，

呢份係 “全日早餐”，而家很多餐廳都全日供應早餐的，

分量當然有番咁上下﹗

傍晚才可接回小黑，費事長途跋涉回家，而且擔心有緊急通知，

所以四圍行下，行到攰，嘆下午茶，抖下。

高級同事升職請食餅，餅是名牌，食落名過其實，

花瓣紅唇只作裝飾，入口的實物不多，味道麻麻地，而且有尐餅底仲濕濕地 ;-(

有日去鴨記搵嘢，醒起好耐冇食印度嘢，又去幫襯 “喀什米爾”，

眼闊肚窄，食唔晒，真係罪過﹗

黎到深水埗，食完濃味的印度午餐，點可以唔探下 “甜入心” ，

椰皇焦糖布甸一級棒，每次都食。

焦糖布甸浮於椰汁之上，其下是估計以椰子水製成，透著淡淡椰香的透明 “啫喱”，

綿滑的布甸、清爽的 “啫喱”、淡香的椰汁(加奶?)，三重口感，好~好~味~呀~ ;DDD

最近有新出品 ~ 榴槤布甸椰皇(?)，搵日試下﹗

 

某日出糧後的晚餐，一個月之中，總會食一兩次日本餐，

其實這餐廳主打日式炸豬扒，吃過一次，不特別出色，
現在逐漸減少食大塊肉，吃魚生飯罪疚感輕尐 . . . ;P 

這餐廳在尖沙咀某商場，久不久會去解饞。

 

咁重口味﹖因為要去影相，仲係夜攝添，儲足能量以備消耗 ;D

又係公司附近的商場的餐廳，頗有好感，月中會食一次，

再食呢個鱈魚，仍然鍾意，還有那杯混了茶的果汁，

詢之侍應小姐，佢話七成橙汁溝雀舌茶，加了少少青檬汁和蜜糖，

飲落茶味幾出，很淡的甜，很好﹗

公司附近大型超市的午餐盒，即點即做，平時幾多人架，

呢日冇人排隊至買黎食，至愛的蕃茄醬意粉，有幾款配料選擇，今次揀了肉丸和蝦。

見到呢枱餃子，當然係要去生態協會啦，呢次係分享課，

兩次外影之後，每人分享兩張作品。

放工後去攞新鏡，順便又食個晚餐。

薯茸南瓜湯好味；照燒汁雜菰劍魚都唔錯，但個汁略鹹；

甜品係士多啤梨玫瑰果醬 pancake 配綠茶雪糕，

賣相與想像很不同，以為係一般的大塊班戟包著士多啤梨，旁邊一球雪糕，

差點看不到的那塊班戟 (在雪糕與士多啤梨之間)，卻最好吃 ;DDD

是日到海濱公園試鏡，由於近便而掉以輕心，沒帶水和帽，

點知抵達公園時已近午，很晒，差點陰溝裏翻船，影咗個零鐘就走嘞，

急不及待坐低醫肚兼灌水。

每次食越南嘢都係呢個 ~ 生牛河兼大量魚露 ;P

替公司做完一場講座的影相佬，高層慰勞的下午茶。

細佬中了幾百元的六合彩請客。

晚餐都好抵，有包、湯、沙律、主菜連飲品也不用六十元。

呢日係星期六，唔知做乜會走咗出尖沙咀食晏呢﹖

豐富午餐，日日帶飯，間中都 “豪” 下 ;P

公司附近的商場開了一間賣日本飯團的檔口，

出品越趨多元化，最近更有多款便檔選擇，頗合口味。