中山街拍美食團 (19晚~21/8/2016)

又跟阿 sir hea 影 hea 食啦。

19/8 晚八時許由深圳坐夜車出發，十一時左右抵埗。

先攞房，今次唔住 “７天”，改住 Ibis，都是集團連鎖酒店。

房間頗闊落、整潔

 check in 後，貫徹阿 sir 作風：食 宵 夜 ﹗

水煮魚、雞煲、炒粉麵、粥，14人食到飽飽 . . . 都有剩，罪過 ~

下圖右邊的大酒瓶，原本店家話送我地三公升啤酒的，

一入口 . . . 嘩﹗咁甜嘅﹖一問之下，店員才講啤酒賣完，所以俾咗呢樽嘢我地，

都唔知邊處湊合返來，當然退貨，另送三支 XX 啤，好淡，係有啤酒味的水 XDDD

 住客加 5 元可享用自助式早餐，粥粉麵、包點少不了，

還有菜沙律、火腿、多士、茶啡，算抵食嘅。

早餐後就行下街、逛下廟、搵下舊屋 . . . . .

舊屋或拆或鎖，食白果﹗

路過這家工場，瞥見屋頂缺了兩塊瓦片，陽光投下 sport light，

灑在金屬工具上，形成光影，

眾生興奮，趨之若鶩，場主是年輕人，很友善，由得我們 “搞搞震”，

離開時，我地當然千多萬謝啦 ;P

這兩天的餐飲由兩位學友負責，衷心感謝他們為大家搵到好嘢食。

每餐都水準不俗，是日午餐的芋頭扣肉、煎釀豆腐兩味吃得個個連連點頭，

仲各多點一碟添；另外虎皮椒、燒雞都唔錯架。

飽餐後，都要試下名物蘆兜糉，食味尚可，蛋黃麻麻地 . . . 乾硬、欠油水。

沙溪荔苑隆都菜館：

 中山沙溪105國道隆家俬城內

（105國道新紅利居家具向西 150米路南 (虎？社區衞生服務站)）

電話：0760-87391118

天氣實在太熱，飯後回酒店小休，

16:00 集合，先到附近餐廳下午茶：每人半隻 (正﹗正﹗正﹗)

 煲煲掂風味煲仔飯餐廳 (西區店)：石岐西區中山一路109號 (凱旋路)

電話：0760-88612312

(就在我們住的酒店隔幾個舖位)

(無緣試其煲仔飯，但乳鴿真係掂)

接著有人去步行街、有人按腳，我則返酒店攤抖 ~ 

行街的仲食雙皮奶雪糕啊 ~  好  嘢 ﹗

食飽瞓、瞓飽食 . . . 又到晚飯時間，今晚主打脆肉鯇魚，

店家推介四食：炸頭、骨；豉汁蒸鯇肉；湯魚片；魚滑。

(鼓掌！ 鼓掌！鼓掌！)

此店乳鴿就麻麻地咯，略乾，非首本。

我地懷疑早炸好，待點菜就翻炸上枱。

信寶脆肉鯇：城南五路14號 (即華通行茶葉市場對面)

電話：0760-88893618

＊　＊　＊　＊　＊　＊　＊　＊　＊　＊　＊　＊　＊　＊　＊　＊　＊

翌日，飲茶。這家酒樓十分 “富麗堂皇”，名字忘了，

粵式點心，OK 嘅，不特別出色。

成個台咁大的電視。

飲茶後，一撥人馬留在酒樓睇奧運女排決賽 (中國對塞爾維亞)，

另一撥就往中山公園，因有學友話想影荷花喎 . . .

今次僱的司機唔識路，有尐躁底，經常不忿別車攝位，同人鬥過﹗

來時在高速公路上，車門突然自動打開，幸有驚無險，

有學友笑說：跳降傘嗎﹖XDDD

由酒樓往中山公園約十分鐘車程，他竟錯上了高速公路，差點去了湛江 ( 搖頭)

一去一回花了成粒鐘，一番轉折，到公園時已近十二時，

是日多了一項節目：遊車河 ;P

中山公園

只剩荷葉

各有各影 ~ ;P

阿 sir 一見頹垣敗瓦，如獲至寶，我地梗跟~~~

又焗又熱又有嘢(唔係蚊)咬，時間不足，因為又夠鐘食飯啦，

阿 sir 話下次再黎﹗

 

返酒店略為梳洗，大家又到 “煲煲掂” 醫肚，豈料高朋滿座，

好在有學友搵到隔鄰蘭州拉麵店有位，且可讓我們外賣乳鴿入店，

坐得比 “煲煲掂” 鬆動舒適，大快朵頤，甚好﹗

“煲煲掂” 乳鴿，每人一隻，少食多滋味，大家都很克制 XDDD

相機就冇乜收穫嘞，肚腩卻長了兩吋﹗

期待下一次的美食 x 攝影團。